ಸತ್ಯಾನ್ವೇಷಣೆ

ಕಂದ ನಿದ್ದೆಹೋಗಿದ್ದ,
ಮನೆಕಟ್ಟಿದ್ದ ಕನಸ ಹೊದ್ದುಮಲಗಿದ್ದ,
ಮನಸು ಮೈಮರೆತಿತ್ತು.
ಅವನೆದ್ದು ಹೋಗಿದ್ದ ಎಲ್ಲವನ್ನೂ ಮಲಗಿದಲ್ಲಿಯೇ ಬಿಟ್ಟು.
ತೆರೆದಿತ್ತು ಮುಚ್ಚಿದ ಬಾಗಿಲೊಂದೇ ......?

ನಿದ್ದೆ ತಿಳಿದೆದ್ದ ಕಣ್ಣು ರಚ್ಚೆ ಹಿಡಿದು ಕುಳಿತಿತ್ತು.
ನೆರೆಯ ಕಣ್ಣೋಟ ಹೊರೆಯಾದ ಬದುಕು.
ಕುದ್ದು ಹೊದ ಬಾಳಿಗೆ ಕದ್ದು ಹೋದವನ ಹುಡುಕಾಟ.
ಧರೆಯ ನೆಚ್ಚಿದ ಯಶೋಧರೆಗೆ ವಸುಂಧರೆಯ ಮುಚ್ಚಿದ ಬಾಗಿಲು.
ನದಿ ತೊರೆದ ನೀರಿನದು ದಿಕ್ಕು ತೊರೆವ ನಡಿಗೆ

ಆಲಾಪವಿಲ್ಲ,ವಿಲಾಪ ನಿಲ್ಲದ ಹುಡುಕಾಟ.
ಅವರು,ಇವರು,ಹೋದವರೆಲ್ಲ ಬಂದರು.
ಆತನೊಬ್ಬ ದಿವ್ಯಜ್ಞಾನಿಯೆಂದರು.
ಬೋಧಿವೃಕ್ಷದ ಕೆಳಗೆ ಸತ್ವ ತುಂಬಿದ ಬೆಳಕು.
ಕರುಣೆಯ ನೋಟ ಶಾಂತಿ ಚೆಲ್ಲುವ ಕಾಂತಿ.

ಜೋಡಿ ಜೀವವಾಗಿ ಮಿಡಿದ ಮನ ಕಾಡಿದ್ದು ಕೆಲಕ್ಷಣ.
ದುಗುಡ ಹೊತ್ತಮನಕ್ಕೆ ಶಾಂತಿಯ ಗೂಡಿನ ತವಕ.
ಸರದಿಯ ಸಾಲು ಕಣ್ಣು ತುಂಬುವಷ್ಟು ದೂರ.
ಸರತಿಯ ದಾರಿಯ ನಡುವೆ ಗುರುತು ಸಿಗಲೆಂಬ ಪುಳಕ
ಹೆಜ್ಜೆಗೊಂದು ಯುಗಸಂದ ದಾರಿ,
ದೂರಸರಿದ ನೀರಿಗೂ ಸಾಗರದ ಬಯಕೆ.

ಕರುಣೆಯ ನೀಲಿಗೆ ಶಾಂತಿಯ ಸೊಗಸು.
ತೀರದ ಆತಂಕ,ಆತ್ಮಾನುಕಂಪಕ್ಕೂ ಅರ್ಪಣೆಯ ಭಾವ.
ಗಮ್ಯ ಸೇರಿದ ಹನಿಗೆ ಅದರದ್ದೇ ಸಾರ್ಥಕತೆ.
ತೆರೆದ ಆಕಾಶಕ್ಕೆ ಯಾವ ಬಾಗಿಲ ಹಂಗು.?

-ಅಮ್ಮ (ಶೈಲಜಾ ಗೋರನ್ಮನೆ)